पूर्वी

फार नव्हता फरक पूर्वी
यायची पण सणक पूर्वी

शोषले कुठल्या जळूने
रक्त होते भडक पूर्वी

वाढले अंतर कशाने
हीच होती सडक पूर्वी

लाट होऊन यायची ती
व्हायचो मी खडक पूर्वी

औपचारिक होत गेली
भेट होती तडक पूर्वी

राहिले आहे पुसटसे
कोरलेले ठळक पूर्वी

मागणी होती सुखाला
मात्र नव्हती चटक पूर्वी

हरवला उत्सव कुठे तो
ज्यात होते टिळक पूर्वी

—  अभिजीत दाते
(लॉस एंजेलिस महाराष्ट्र मंडळाच्या २०१५ दिवाळी अंकात प्रकाशित)

 

Advertisements