पुरे..!

एक तारा पेटुनी उठला पुरे..!
वीतभर काळोख विस्कटला पुरे..!

घोषणा, आंदोलने पुढचे पुढे,
भाषणाला येऊनी बसला पुरे..!

कायद्याचा खेळ आम्ही पाहिला
न्याय नाही लाभला; खटला पुरे..!

दर्शनांती देव नाही भेटला
राहिल्या शाबूत या “चपला” पुरे..!

वाहवा त्याला हवी तितकी मिळो.
दाद “एसेमेस”ची मजला पुरे..!

मी स्वतःचे रक्त का सांडू असे ?
हा जरासा हात खरचटला, पुरे..!

देव, देशास्तव समाजास्तव नको
तो स्वतःसाठी जरी लढला पुरे..!

जीवनाचा अर्थ कोणाला हवा ?
शेवटी आरंभ उलगडला, पुरे..!

– अभिजीत दाते