Posted in Uncategorized on November 21, 2007 | No Comments »
अता रात्र नाही गंधाळलेली..
उरी चंद्रकोरी कवटाळलेली..
तरीही बहर निशिगंधास येतो
नजर मात्र त्याची ओशाळलेली..
सखे शब्द होते कविता सहेली
अता फक्त पाने चुरगाळलेली..
पुन्हा एकटा मी उरतो किनारी
पुन्हा लाट येते फ़ेसाळलेली..
जरा थांब मरणा सोबत तुझ्या घे
मला जिंदगीही कंटाळलेली..
किती जाळण्याची केलीत घाई
तरी राख मागे रेंगाळलेली…!
– अभिजीत दाते
Posted in Uncategorized on November 7, 2007 | No Comments »
दिवस येतात, दिवस जातात
सुखदु:खांची ओंजळ देउन हातात..
प्रकाश जीवनातला आटत जातो .
अंधार मात्र दाटत जातो .
पण कोपर्यात कुठेतरी
इवलासाच दिवा असतो .
त्याचा एक किरणसुद्धा
मग आपल्याला हवा असतो .
सत्कर्याचा असाच दिवा,
सद्भावाची अशीच पणती ,
जीवनमार्गावर धावत असता
तेवत राहो आपुल्या चित्ती..
पुन्हा घेऊ नवी भरारी ,
गत ते सारे तमासमान !
चला साजरी करू दिवाळी ,
सुरात गाउन प्रकाशगान..!
- अभिजीत दाते
